Maayong adlaw sad nimo dai! Maayo unta ug naa ka sa maayong kahimtang samtang nagbasa ning akong tubag sa imong problema.

Bahin diay sa imong problema sa gugma. Usa ra jud ang akong ikasulti. Kung ganahan ka makigbuwag kay buwag jud. Ayaw na pagduha-duha ug tulo tulo. Pero kung love jud nimo siya ug ganahan ka forever together ang inyong drama, ayaw mu pagbuwag. Sayon raman jud kaayo na Sheila oi! Unya kung ganahan ka mutilaw ug lain nga laki, tilaw lang gud, wala may nagpugong nimo. Ayaw lang gud sulti-i imo uyab. Tilaw raman kaha, dili man kaha mas grabeh pa sa tilaw. Pero kung mahibaw-an sad sa imong uyab nga naa kay lain, advantage man sad na sa imong part. Diha nimo mahibaw-an ang iyang tinuod nga feelings para nimo. Kung dawaton lang gihapon ka niya bisan nakahibalo siya about sa imong lain nga relationship, meaning ana, super love jud ka niya. Pero kung dili na gani ka dawaton. Hala! Kalimti nalang na siya. Taas ra kaayo ang iyang pride ug bati sad na nga dili niya makaya ug accept ang imong mga kasayupan sa kinabuhi.

So Sheila, hina-ot unta nga natubag nako ang imong mga pangutana. Ug lain pa nga advice. Huna-huna sa ug taman before muhimo ug importante nga desisyon. Kinahanglan mga at least 1 year jud na nimo nga hunahuna-on para dili jud ka magbasol. Good luck sa paghimo sa imong desisyon. Mayta ug tagaan ko nimo ug update kung unsa ang imo desisyon after 1 year!

Kanunayng matinabangon,

Nang Lagring

Maayong adlaw kanimo diha!

Itago lang ko sa ngalan nga Sheila. 22 anyos nga lumad taga Labangon, Cebu City. Mao ni ang akong problema Nang Lagring, naa ko uyab nga itago nato sa pangalan nga Lito. Since second year college kay uyab nami hangtod karon nga nagtrabaho na mi. Siya ang akong una nga hinigugma ug ako sad ang iyang first girlfriend. As in pareha jud mi nga first timer. Pero karon, murag mapul-an naman ko niya panagsa. Kung sa sud-an pa, napul-an nako ug kaon sa ngohiong, ganahan nasad ko mutilaw ug siomai. Pero di man sad ko ganahan makigbuwag niya kay love man nako siya.

Ako ni gi-open up sa akong mga amiga. Ang ila jud nga advice kay dili jud nako buhi-an si Lito kay sayang kuno. Buotan man gud si Lito Nang Lagring. As in wala jud koy problema nya. Gi-respeto ug gipangga jud ko niya taman sa iyang makaya. Hinuon, panagsa kay magkalalis mi pero dali raman sad namo masulbad ang among problema. Pero ang naa sa akong hunahuna kay what if magminyo nami, dayon siya ra ang akong na-uyab ug si Lito sad, ako ra ang iyang na girlfriend. Dili ba kaha mi mapul-an sa usag-usa? Dili ba kaha inig minyo nami mangita ug lain nga karelasyon? Tabangin ko Nang Lagring kung unsa ang akong angay nga buhaton. Makig-cool off pa ko niya ug mutilaw sa lain nga sud-an or ipadayon nako ang among relationship?

Yours truly,

Sheila